Ram hralhah fimkhur turin inchah

Chhimphei Group YMA chuan ngenna siamin, ram hralh chungchangah ngaihtuahna fim tak hmang turin an huam chhunga khawtlang hruaitu, nu leh pa leh mi tinte an chah.

Chhimphei Group YMA chuan, March 18, 2022-a Group YMA Rorel Inkhawmah mi hausa hnena ram hralh nasa lutuk a ṭhat lohzia inzirtir thar a ṭul thu ngaihtuah a ni tih tarlangin, "Tuna nawmsak châka kan tuihâl avanga ram kan hralh hian ṭhangthar, kan tu leh fate tan eizawnna kawng kan tiping thei a, hun rei lo te chhung kan khawsak nawm deuh beiseia hmun lo ram kan tirîral hian kan tuchhuan awm zel turte tan retheihna a thlen thei tih hriat a pawimawh hle," an ti.

Ram hralh chhan hrang hrang a awm theih rualin, a leitu pawhin a lei chhan chi hrang hrang a awm thei tih tarlangin Chhimphei YMA chuan, "Hman ṭangkai loh ram âwl, mi hausa ta ni tlat tawh si, tu'ma khawih theih tawh loh hmun tinah a awm ta diai duai mek a ni," an ti a; sorkar hna a váng tial tial a, mahni kutkawih ngeia eizawnna din a la ṭul zual zel dawn avangin ram neih a la pawimawh tial tial dawn tih an sawi.

Chhimphei YMA chuan, ram hralhna sum leh pai ei zawh rualin ram hralhnate hnuaiah, mahni ram ṭhin hmunah ngei inhlawhfâk a la ṭul thei tih sawiin, "Mizoramah ngei pawh mahni ram hralhna hmuna rûk ru leh si sawi tur an awm ta mek a ni. Chuvangin, tuna khawtlang hruaitu te, nu leh pa, chhungkaw enkawltu ni mekte hian ngaihtuahna tak tak i hmang ang u," an ti.

Chhimphei Group YMA chuan, "Zoram hi ram nuam, ram zalên leh rethei leh hausa kar zauh lutuk lohna ram, chhuân lo la awm zel turte tana chênna tlaka siam tur hian tuna a luah mektute hian mawh kan phur a, hma kan lâk a ṭul a ni," tiin, an huam chhung mipuite chu ram an neihte hum ṭha turin an chah a ni.