CYLA-in inkhawmpui an hmang

Central Young Lai Association (CYLA) chuan May 6, 2022 khan CYLA Hall, Lawngtlaiah YLA General Conference vawi 29-na an hmang a, president thar atan HC Vanlalruatpuia an thlang.

Covid-19 avanga mumal taka inkhawmpui neih theih a nih loh hnuah YLA General Conference vawi 29-na hman a ni a, branch tin aiawh mi paruk ṭheuh an tel.

YLA inkhawmpui rorel zingah - Lai Autonomous District Council (LADC) huam chhunga environment humhalh te, lui leh thing leh mau humhalh te, Lawngtlai district-ah Institution of Rural Development Training Centre a awm theih nana hmalak te, hmarchhak state danga autonomous district council-in thuneihna an neih ang LADC-in a neih ve theihna tura hmalakte a tel.

Kum 2022-23 chhunga YLA kumpuan atan 'Ram leh hnam humhalh' tih an thlang a; YLA hruaitu hlun mi 17 hnenah chawimawina thuziak an hlân bawk.

CYLA hnuaiah hian YLA branch 115, sub-headquarters pasarih, group YLA pasarih leh joint YLA pakhat a awm a; YLA member mipa 36,540 leh hmeichhia 19,820, an vaiin 56,360 an awm mek a ni.