Ni ruk chhung hripui vei thi awm tawh lo

Mizoramah Covid-19 vei May 6, Zirtawpni khan mi 27 leh May 7, Inrinni khan mi 17 hmuh chhuah a ni a, kumin 2022 chhunga hmuh tlem ber ní a thleng chho zel. Nimin leh Inrinni khan hripui vei dam tawh mi 91 chhuahtir an ni a, ni ruk chhung Covid-19 vei thi an awm tawh lo.

May 6-a hripui vei hmuh chhuahte chu mipa 15 leh hmeichhia 12 an ni a; RAT hmanga hmuh vek niin, positivity rate chu 8.36% a ni. RT-PCR leh TrueNAT hmangin swab sample endik ni mah se, positive an awm lo.

Inrinnia Covid-19 vei hmuh tharte chu mipa pariat leh hmeichhia pakua an ni a, RAT hmanga hmuh vek niin, endikna hmanraw dang hmangin positive hmuh a ni lo a, positivity rate chu 6.34% a ni.

Inrinni khan hripui vei dam tawh mi 61 chhuahtir an ni a, nimin khan mi 30 chhuahtir an ni bawk a; Covid-19 positive enkawl lai mi 219 chiah an awm tawh. Ni ruk chhung Covid-19 vanga thi an awm tawh lo a, thi an awm hnuhnun ber chu May 2, 2022 kha a ni.

IDSP record angin, Mizoramah Covid-19 vei 2,27,720 hmuh chhuah a ni tawh a, mipa 1,06,039 leh hmeichhia 1,21,691 an ni a, mipa aiin hmeichhia 15,652-in an tam zawk. Nimin tlai dar 5 thleng khan mi 2,26,804 (99.60%) chhuahtir an ni tawh a, mi 697 (0.31%) thi tawhin, enkawl mek mi 219 (0.09%) an awm.

Nimin tlai dinhmun angin, Mizorama district zawng zawngah Covid-19 positive inenkawl lai mi 70 awm tlinna a awm rih lo a, enkawl lai tamna ber Aizawl district-ah mi 62 an awm. Siaha, Lawngtlai, Hnahthial, Kolasib leh Champhai district-ah positive enkawl mek mi 10 aia tlem ṭheuh an awm mek a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 2,27,720 chu mi 1,000 zelah hripui vei mi 207 an awm ang a ni a; mi 1,00,000 zela Covid-19 vangin mi 63 an thi tawh ang a ni tih sorkar thuchhuakin a tarlang.