KHAWTHLIR

Thisen pe
May 7, Inrinni khan ṬKP, Bawngkawn Pastor Bialte'n Civil Hospital, Aizawl tan thisen unit 45 an pe a, petute mipa 41 leh hmeichhia pali an ni. Tuithiang Branch YMA pawhin an branch din champha pualin Synod Hospital tan thisen unit 21 an pe a, petute mipa 18 leh hmeichhia pathum an ni.

Ar notê sem
Fostering Climate Resilient Upland Farming System in the North East (FOCUS) project hnuaiah AH&Vety department chuan May 7, Inrinni khan Champhai district-a khua/veng 45-a ar vulh tura thlan mi 300 hnenah ar notê leh a enkawlna tur hmanraw chi hrang hrang an sem. Ar notê semna hun hi Champhai DVO pisa tualah hman a ni a; Champhai DVO Dr B Lallawmsanga'n hamṭhatna dawngtu mi 300 hnenah FOCUS project hnuaia Rural Backyard Poultry Farming kaltlangin rainbow rooster ar notê 20 ṭheuh, ar chaw, chaw pekna leh tui peknate a hlan a ni.

Red Cross Day
Assam Rifles-te chuan nimin khan New Vaikhawtlang leh Mimbung khuaah Red Cross Day pualin hun an hmang a, tualchhung mi 63 an tel. Red Cross leh an hnuaia inziak lutte'n mi dangte ṭanpuina atana an hmalaknate leh mi dangte ṭanpui pawimawhna leh hlutziate an zirtir a ni.

IPS-ah kái
Mizoram Police Service (MPS) officer C Lalthanmawia chu sorkar laipui chuan Indian Police Service (IPS)-ah a kaitir a, AGMUT cadre pek a ni. Hemi chungchangah hian Ministry of Home Affairs chuan May 2, 2022 khan hriattirna a tichhuak. C Lalthanmawia hi Fire & Emergency Services director a ni mek a, MPS-ah 1989 batch a ni.

Vety-in enfiah
Indo - Myanmar Trade Point, Zokhawthara Myanmar aṭanga ran lakluhte enfiahna hmun tura ruahman chu tunhnai khan AH & Vety department hotute'n an enfiah. AH & Vety dept. hotute chuan ram dang aṭanga ran lakluh kawngah natna laka an himna ngaih pawimawh a ṭul thu an sawi.