Entrepreneurship Development Scheme Sumdawnna kawng sialna tur hawng

Mizoram sorkarin sumdawnna kawng inkawhhmuhna atana a ruahman, Entrepreneurship Development Scheme (EDS) chu nimin khan Mizoram University (MZU) Auditorium-ah chief secretary Lalmalsawma'n a hawng. EDS atan hian sorkar kum kal mekah cheng nuai 200 dah a ni.

Chief Secretary chuan, Mizoramah entrepreneur hlawhtling takte leh bul ṭan mekte an awm thu sawiin, "Heng mite hi ram nghahfâk leh ram hmasawnna bultumtu an nih avangin, anni hian mi tam zawk zirtirna an pek leh kaihhruai hi sorkarin a ngai pawimawh em em a ni. Entrepreneurship pawimawhna sorkarin a hriat avangin EDS a siam a, sorkar kum kal mek atan cheng nuai 200 dah a ni," a ti a; sorkar kum tharah pawh a ṭul phawt chuan sum tam zawk dah thei turin sorkar chuan rilru zau tak a put thu a sawi.

Entrepreneurship sawifiahin Lalmalsawma chuan, "Entrepreneurship hi mahni kutkawih ngeia eizawnna, a taima leh remhria apiangte dinchhuahna a ni. Qualification leh eligibility a ngai ve lo a, kum bithliah leh hna thawh hunbi a ngaih ve loh avangin mi tin ban phâkah a awm. Mizoram sorkarin entrepreneur-te hmakhua ngaia a duan EDS hi entrepreneur-te nen thawhhona ṭha taka kalpui a nih chuan Mizoram hmakhua a êng a ni," a ti.

Planning secretary Dr C Vanlalramsanga pawhin thu sawiin, "EDS hi Mizoram dinhmun, subsistence economy aṭanga market economy a làwnkai nana NEPD hnuaia sorkar hmalakna a ni. Entrepreneurship hi Mizoram state economy siamṭhat nana hmalakna awmze nei berte zing a mi a nih avangin sorkar pawhin a ngai pawimawh hle," a ti a; entrepreneurship development chu tunlaia khawvel leh India ram state-te intlansiakna a nih thu a sawi.

Chawhnu lamah Higher & Technical Education secretary Benjamina kaihhruaina hnuaiah Mizorama entreprenuer hlawtling te, college hrang hrang zirlai te, MZU-a department hrang hrang hotu te, Mizoram Skill Development Society leh Mizoram Youth Commission hotute leh department hrang hrang aiawhte'n EDS chungchang an sawiho.