Petrol leh diesel harsatna tawh ṭhin chhan sawifiah

All Mizoram Petroleum Dealers’ Association (AMPEDA) chuan thuchhuah siamin, Mizoramin petrol leh diesel-a harsatna a tawh ṭhin dante an tarlang.

AMPEDA tarlan danin, December 2016 laihâwl velah tuialhthei lakna ber Guwahati-a depot-ah harsatna a awm avangin lak theih a ni lo reng a, chu vang chuan Mizoramah petrol leh diesel a thleng ṭha lo a ni. Hunpui laia Mizoram mipuite’n harsatna an tawh lohna atan AMPEDA chuan depot thuneitute hnenah ngai pawimawh turin an thlen a, chu chu thuneitute’n an ngaih pawimawhsak a ni.

Mizoramin khawnvartui leh gas angin petrol leh diesel-ah quota a neih loh thu sawiin AMPEDA chuan, “Company lam aṭangin hralh tam tura nawr reng kan ni thung. Mizorama petrol leh diesel kan hmuh ṭhat leh ṭhat lohah hian oil company aṭanga hmuh ṭhat leh ṭhat lohah a innghat. Tun dinhmunah chuan harsatna a awm lo a, company lam aṭanga supply a ṭhat loh chuan harsa thut thei reng kan ni,” an ti.

AMPEDA chuan, Guwahati aṭangin chawlhkar khat chhungin tanker pakhatin vawi khat bak an kal hman lo tih sawiin, “Kan hnaivaia oil depot - Vairengte, Ramnagar leh Silchar-te ṭangkai taka hman chu ni se harsatna awm leh zauh ṭhinte hi thui tak sutkian theih beisei a ni,” an ti a; petrol leh diesel-a harsatna a awmin páwng indem ngawt lo a, anmahni zawtfiah turin mipuite an ngen a ni.