Pistol pakhat leh mi pathum man

Kulikawn Police Station-a police-te chuan January 17, 2017 zan khan New Secretariat Complex-ah 9mm Glock pistol pakhat leh magazine pahnih an man.

Police hotute hnen aṭanga thu dawn danin, police-te chuan Lalawmpuia, Sateek chu motor hralh chungchangah mi pahnih a bum avangin an man a; police-in thu an zawhfiahna aṭangin Lalawmpuia hi C Lalnunmawia, Mission Veng leh Lalremsanga, New Secretariat Complex nen an inthurual ṭhin tih hriat a ni.

Thubuai chhuina kal zelah Lalremsanga hian Austria siam, 9mm Glock pistol a kawl tih hriat chhuah a ni a, police-te chuan Thawhṭanni zan khan New Secretariat Complex-a an chenna inah pistol chu an man a ni.

Dan loa silai neia puh mi pathumte hi Arms Act tlawhchhanin Aizawl Police Station-ah thubuai siamsak an ni a; C Lalnunmawia leh Lalremsanga te chu nimin khan Court-ah thawn nghal an ni. Lalawmpuia erawh chu thu zawhfiah atan Kulikawn Police Station-ah hrên mek a ni thung.