Kau Tlabung leh Tuipanglui MHP-a thutlukna HC-ah khing lêt

Kau Tlabung Mini Hydel Project (MHP) leh Tuipanglui MHP thubuaia Aizawl District & Session Court thutlukna chu, nimin khan Mizoram sorkar­in Gauhati High Court, Ai­zawl Bench-ah a khing lêt.

Aizawl District & Session Court-in Kau-Tlabung MHP leh Tuipanglui MHP thubuaia thil tisualtua puhte thiam a chantir avangin sorkar ukilte an lungawi lo a, Gauhati High Court-ah khin let an dil a ni.

Sorkar ukilte dilna hi Mizoram sorkarin November 21, 2016-ah a pawm a, Anti Corruption Bureau (ACB) leh Gauhati High Court-a sorkar ukilte'n thil pawimawh hrang hrang an buaipui zawh hnuah, khin letna hi nimin khan public prosecution AK Rokhum chuan High Court-ah a thelut a ni.

Thu dawn danin, khin letnaah hian Aizawl District & Session Court thutluknaa Mizoram sorkar lungawi lohna chhan hrang hrangte tarlan a ni a; High Court-in a ngaihtuah hun tur erawh tihfel a la ni lo.