IPR officer-te leh MJA member-te inkâwm

Information and Public Relations (IPR) department chuan nimin khan IPR directorate conference hall-ah IPR officer-te leh MJA member-te pualin kum thar thingpui ruai an buatsaih a; IPR minister Lal Thanzara'n a hmanpui.

IPR leh MJA informal meeting hi IPR director thar Lalnithangi'n a kaihruai a; minister Lal Thanzara chuan, journalist-te chu sorkar kalphung dik lote sawisel hreh lo tura chahin, "Sorkar kal dik lo ven leh tih dik lohte hriattir a, sawisel hreh lo a, tîm loh a ṭha awm e," a ti a, chutih rualin, sprkar hmalaknate ṭawiawm ṭha a, sorkar thil tih ṭhatte puanzar ṭhin a ṭul thu a sawi.

Lal Thanzara chuan, chanchinbu chhuah dan kalphungah hmasawnna a awm thu sawiin, lawmawm a tih thu a sawi a, "MJA member-te leh accredited journalist-te inchhawk ṭhen a ngai erawh a hrehawm hle. Inchhawk vang hian quality ṭha zawk neih phah ila, inchhawk ngai lo tura ṭan lak zel a pawimawh a ni," a ti.

IPR Minister chuan, sum lama harsatna vangin sorkarin a duh angin journalist-te a tuamhlawm thei lo chu hrehawm an tih thu a sawi rualin, a theih ang angin ṭanpui zel an nih thu a sawi a; IPR leh MJA-te chu lungrual taka kal dun tur an ni tih sawiin, infinchhuah zel turin kalkhawmte a chah a ni.

Inkawmhonaah hian IPR secretary B Lalthanliana leh MJA president Vanlalrema Vantawl te pawhin thu an sawi a; IPRO leh MJA member-te'n an ngaimawh zawngte an sawi bawk.