Pawisa thi vanga harsatna chinfel phûtin Congress party mite an pungkhawm

Sorkar laipuiin nikuma Rs. 500 leh Rs. 1,000 note hlui a tihthih vanga mipuiin harsatna chi hrang hrang an tawhte chak zawka chinfel phûtin, Congress party ṭhalaite chuan nimin khan Aizawla RBI pisa kawtah lungawi lohna an lantir a; prime minister Narandra Modi chu demonetisation aṭanga black money lak let tawh zat puang turin an phût.

Congress party chuan India ram pumah nimin khan pawisa note hlui tihthih vanga harsatna chinfel phût nan RBI pisa hrang hrang kawtah lungawi loh an lantir a; Mizorama Congress party-te pawhin zâwmin, nimin chhun dar 12 aṭang khan Dawrpuia RBI pisa kawtah Congress ṭhalaite an pungkhawm a ni.

MPYCC chuan November 8, 2016 zanlai aṭanga Rs. 500 leh Rs. 1,000 note hlui tihtawp a nih aṭanga India sorkarin dan loa sum chhehrelh (black money) a lâk lêt tawh zat mipui hriata puang ngei turin Prime Minister an phût a, "Demonetisation vanga India ram economy-in a tawrh dan leh mimal hna chelh lai chelh chhunzawm thei lo zat leh mipui ni tin khawsak phung a nghawng dan hi Modi hian puangzar rawh se," an ti.

Congress ṭhalaite chuan, pawisa note tihthihin mipui nun a nghawng vanga nunna chán zat te, nunna chán ta chhungkuate zangnadawmna sorkarin a pek loh chhante PM Narendra Modi an zawt a, "He hmalakna rapthlak tak hi kalpui a nih hmaa sorkar inpuahchah dan mipui hnenah puanzar ni rawh se," tiin, November 8, 2016 hnua bank-a cheng nuai 25 chin dah lutte mimal/pawl hming puangzar tur leh bank account tihtawpsak tawhte an puangzar turin an phût bawk.