NLUP-ah phunnawina awm lo turin Ruahmanna siam a ṭul - CM Hawla

Chief minister Lal Thanhawla hoin, Thawhlehni khan NLUP conference hall-ah AH&Vety department hnuaia vawk note sem mek leh Horticulture department hnuaia tui dahkhawlna 'geo-membrane' lei dan tur sawiho a ni a; Chief Minister chuan, NLUP hnuaia hmalaknaah phunnawina awm lo tura ruahmanna siam a ṭul thu a sawi.

Meeting-ah hian Horticulture department hmalak dan te, a muangchàn chhante leh sawiselna neuh neuh a awm chhante sawiho a ni. Meeting-a tarlan danin, AH&Vety department hnuaiah NLUP third phase-ah December 2016 thlengin vawk note 48,978 sem turah 8,394 sem a ni tawh. A thawh khatna atana mi 8,163 tana vawktê 24,489 mamawh chu hmuh theih ngei beisei a ni.

Sial leh bawng vulhtute tana ran chaw uar zawka chíng turin AH&Vety department chu ruahmanna siam tura tih a ni a; Central scheme aṭanga sum hman theih remchangte dapin, ran chaw ṭha ‘green fodder’ hmanga bawng vulhna kalpui dan tur ruahmanna Chief Secretary hoin siam ni se, an ti bawk.