Synod Conference Centre-ah BSI Office MG Road-ah lirthei tlân theih rih loh

Bible House kawta MG Road kawngpui khî vangin Bible Society of India (BSI), Aizawl Auxiliary chuan an bungruate an thiar chhuak mek a, BSI Aizawl Auxiliary hi Synod Conference Centre-ah an insuan lut phawt dawn.

BSI Aizawl Auxiliary pisa leh BSI-a thawk chhungkaw pathumte chu January 16 khan an inthiar chhuak ṭan nghal. BSI Aizawl Auxiliary hotute chuan, Mizoram Synod hruaitute'n an remtihsak angin, BSI office leh bungruate chu Synod Conference Centre-ah an dah lut tih an sawi. Tun kar chhungin an inthiar luh zawh hman beisei a ni a, kar leh aṭangin Synod Conference Centre-ah pisa kai tawh turah an inngai a ni.

Hetihlai hian MG Road-a Bible House bul a khîk nasat avangin nimin aṭang khan MG Road-ah Sikulpuikawn aṭanga Raj Bhavan lam pana lirthei tlan phal a ni lo a; hei hi hriattirna dang a awm leh hma chuan kenkawh tur a nih thu Traffic SP C Lalthanmawia chuan a tarlang. MG Road-ah hian chhim lam pante chauh tlan theih a ni.

Traffic SP chuan, Zarkawt kâwn leh Zarkawt Presbyterian Kohhran biak-in inkar kawngpui sirah Pathianni chawhma dar 9-10 inkarah lirthei hûn/dah phal a ni lo a; Pathianni chawhma dar 9-10 inkarah vek chhuk záwng (Zarkawt kawn panin)-a tlan phal a ni dawn lo bawk. Hei hi January 22, 2017 aṭanga hman ṭan tur a ni.