Hripui vei pakhat hmuh belh a ni Covid-19 vei mek mi 90 an awm

Zoram Medical College (ZMC) Covid-19 Laboratory-ah June 21, Pathianni khan Covid-19 hripui vei mi pakhat hmuh chhuah leh a ni. Hetih lai hian, Covid-19 vei Pathiannia endik nawn zinga mi 36-in hripui an vei tawh lo tih hmuh chhuah a ni a, niminah hripui vei ZMC-a enkawl lai zinga dam tawh mi pathum chhuahtir an ni bawk a; heti hian Mizoramah Covid-19 vei mek mi 90 an awm.

SRH-ZMC Covid-19 Bulletin-in a tarlan danin, Pathiannia swab sample endikte hi State Referral Hospital (SRH)-a awm sate bakah, Aizawl, Siaha, Mamit leh Khawzawl district-a mi 562-te sample a ni a; hripui vei mi pakhat hmuh chhuah ni mah se, mi dang zawng (561)-te chu an fihlîm a ni.

June 21 ZMC laboratory-a sample endikte hi Aizawl district mi 459 (mipa 206; hmeichhia 253), Siaha district mi 30 (mipa vek), Mamit district mi 22 (mipa 11; hmeichhia 11), Khawzawl district mi 38 (mipa 16; hmeichhia 22) leh SRH-a damlo enkawl mek mi 13 (mipa 6; hmeichhia 7) an ni.

ZMC Laboratory-ah hian nimin khan ZMC, Aizawl, Khawzawl, Siaha leh Lunglei district-a mite swab sample eng emaw zat endik leh a ni a, result erawh hriat hman a ni lo.

Covid-19 vei hmuh chhuah thar hi mipa kum 30 mi, tun hnaia Delhi aṭanga haw, Siahaa quarantine centre-a awm mek a ni a; June thla tir lamah a swab sample lak a lo ni tawh a, June 14-a result an hriatah hripui a vei lo tih hmuh a lo ni tawh. Tunah hian hripui vei tih hmuh chhuah ni mah se, a taksaah harsatna a nei lo.

Sorkar thuchhuah tarlan danin, January 21 vêk khan ZMC Laboratory-ah hian a hmaa Covid-19 vei hmuh chhuah tawh, Lunglei district mi 45 (mipa 28 leh hmeichhia 17)-te leh Khawzawl district mi pahnih (hmeichhia ve ve)-te swab sample endik nawn leh a ni a; Lunglei district mi 35 (mipa 21 leh hmeichhia 14)-te leh Khawzawl district-a mi pakhatte chuan Covid-19 an vei tawh lo tih hmuh chhuah a ni.

Lunglei DC V Lalsangliana leh Khawzawl DC H Lianzela ten Vanglaini palai zawhna chhánga an sawi danin, an district mi Covid-19 vei, tuna vei tawh lo tih hmuh tharte chu sorkar protocol angin ni thum chhung enkawl an nihna Covid Care Centre (CCC)-ah an awm leh phawt ang a, chumi hnuah chuan an dinhmun a ṭhat chuan chhuahtir theih an ni ang.

Covid-19 vei tawh lo hmuh chhuah tharte zinga a tam zawk chuan enkawl an nihna hmun an la chhuahsan lo a; chutih rualin, SRH-a Covid-19 vei enkawl zinga hripui vei tawh lo leh enkawl dam tawh mi pathum - Aizawl district mi pahnih leh Mamit district mi pakhatte chu nimin khan SRH (ZMC) aṭangin chhuahtir an ni.

Heti hian, Mizorama Co­vid-19 vei hmuh chhuah tawh zawng zawng chu mi 142 an ni a, chu'ng zinga mi 52 chuan an vei tawh lo tih hmuh chhuah a ni leh tawh bawk a; Covid-19 vei mek zat chu mi 90 an ni.

SRH-ZMC-ah Covid-19 vei mi 37 enkawl mek an ni a, Isolation Ward-ah an awm. Nimin khan hripui vei rinhlelh thilah mi panga dah luh thar a ni bawk.