Aizawl-Behliangchhip bus a tlân ṭan ; 'Kan êng kan chhuahna tur a ni' - CM
Mizoram sorkarin 'Hnam inpumkhatna bus' tia hming a vuah Aizawl leh Behliangchhip, Tipura inkara Mizoram State Transport (MST) bus tlan tur chu nimin khan a tlân ṭan a, bus tlân hmasa ber chu nimin zing khan Transport directorate kawt aṭangin chief minister Zoramthanga'n a vailiam.
CM Zoramthanga chuan, Aizawl-Behliangchhip inkara MST bus tlântir chu state leh ram danga MST bus tlàntirnaah a bul ṭanna a nih thu sawiin, "A dang zel pawh hring chhuaktu a ni dawn. Zo fate Jerusalem Aizawl aṭanga kan êng kan chhuahna tur a ni a, khawvel ram tina chanchin ṭha kan hrilna tur hmanrua a ni," a ti.
Zampui tlangdunga bus service neih chu rei tak aṭangin an duhthusam a nih thu sawiin Zoramthanga chuan, "Nasa takin hma kan la a, mahse, Covid-in min tihbuai avangin kan duh angin kan kal thei lo," a ti a; theihtawp chhuaha hmalakna a hlawhtling ta chu lawmawm a tih thu a sawi.
Chief Minister chuan, Manipur lamah pawh bus tlantir an tum a, Covid-19 avangin a la puitlin theih loh thu te, Myanmar-ah bus tlantir turin hmachhawp an neih thu te, Mizoram leh Bangladesh inkara bus tlantir tur pawhin tun hnaia Bangladesh minister lo kal pawhin a phûrpui thute a sawi a, "Kan ṭhenawm ramte'n min duhna ber chu insumdawn tawnnate aiin, remna ram, ram rálmuang kan nihna hi a ni a, hei hi min mamawhna ber a ni a, kan theihtawpa ti turin hma kan la ang," a ti.
Aizawl leh Zampui tlangdung inkar a hnaih zawkna turin, Mamit aṭanga Vanghmun zâwna kawng kal turin hma an lak thu sawiin Zoramthanga chuan, "Duhthu sâm lo mah se, a tlang ṭha thawkhat tawh viau a, Tripura lamin an ti ve mek bawk," a ti a, a hlawhtlin theih chuan Zampui tlangdung a hnaih sawt dawn thu a sawi a ni.
Bus vailiamna inkhawm kaihruaitu Transport minister TJ Lalnuntluanga chuan, hnam inpumkhatna chu sorkar thil tum a nih thu sawiin, "Ram leh hnamin hma a sawn theihna tura hmalakna hian material infrastructure ringawt a huam lo. Hnam zahawmna leh inpumkhatna ṭha neih tel a pawimawh," a ti a, hmasawnna tluantling nei turin culture-a innghata hmasawn tum a ngaih thu a sawi.
Mizote chu hnam tlem an nih thu sawiin TJ Lalnuntluanga chuan, "Kan hnam hi kan inpawh ṭhat a ngai zual hle. Tuna bus service pawh hi chumi rilru pu chunga ruahman a ni. Bus service tur hian hun khirh lai ber hripui len laia Chief Minister hmalaknain bus leina tur sum mamawhte leh a ṭul ang ang buaipui a ni," a ti.
Aizawl-Behliangchhip bus chuân màn (fare) chu Rs 476 a ni a, Thawhṭanni leh Ningani zing dar 6-ah Aizawl aṭanga chhuakin, Thawhlehni leh Zirtawpni zing dar 6-ah Behliangchhip aṭangin a chhuak ṭhin dawn. Bus vailiamnaah hian deputy speaker Lalrinawma, minister of state Robert Romawia Royte leh MLA pathum - Ramthanmawia, Lalrinsanga Ralte leh Zothantluanga te pawh an tel a ni.