Boeing-in Mizoram tan ECG an pe dawn

Minister Dr R Lal­thang­liana chuan May 7, Inrinni khan New Delhi-ah Boeing company hotute leh Bangladesh High Commission aiawhte a kâwm. Boeing hotute chuan, Mizorama primary health centre (PHC) zawng zawng tan ECG khawl leh diagnostic labora­tory pek an lo tiam a ni.

Boeing leh an thawh­puite nen an inkawmnaah Dr R Lalthangliana chuan, Boeing-in an CSR aṭanga Mizoram tana hriselna endikna tur kháwl chi hrang hrang an lo pek tawhte avangin lawmthu a hrilh.

Boeing hotute chuan, Mizoram tan ECG khawl pali an pek belh dawn thu te, Civil Hospital, Aizawl tan MRI khawl pek an tum chu hun rei loteah Mizoramin a dawn tur thu te, Mizorama PHC zawng zawng tan ECG khawl leh diagnostic laboratory pek an intiam a, a rang thei ang bera hma an lak dawn thu an sawi.

Commerce & Industries minister R Lalthangliana hian New Delhi-a Bangladesh High Commission-ah an minister (Commercial) Dr AKM Atiqul Haque leh hotu dangte a kâwm a; Mizoram leh Bangladesh insumdawn tawnna tura hmalaknate chak zawka kalpui zel dan tur an sawiho. Dr AKM Atiqul Haque chuan, hmalakna chak zawka kalpui a nih theih nan theihtawp chhuah an tum thu a lo hrilh.

Minister Dr R Lalthangliana hi Rajya Sabha MP K Vanlalvena, Health secretary R Lalramnghaka, NHM mission director Dr Eric Zomawia, New Delhi Mizoram House-a additional resident commissioner Alexander V Chongthu leh Health department consultant Dr Hmingthankimi ten an ṭawiawm a ni.