Assembly golden jubilee seminar buatsaih

Mizoram Legislative Assembly kum 50 tlinna, golden jubilee lawm­na kal mekah nimin khan Assembly House Annexe conference hall-ah seminar buatsaih a ni a, chief minister Zo­ramthanga'n a hmanpui.

Chief Minister chuan, kum 50 chhunga Legis­lative Assembly kalphung­ah hmasawnna nasa tak a awm tih sawiin, "Felfai taka rorelna kalpui a ni ṭhin te, House rorelna chhunga ri nuai nuai, thil ṭha chhuak chuang si lo hmuh tur a awm lote hi a entawntlak hle a ni," a ti.

Tuna an dinhmun chu duh tâwk mai tur a nih loh thu sawiin Zoramthanga chuan, "Jubilee dang pawh Mizoram Legislative Assembly hian a la hmu leh zel tura beisei chungin, House activity-ah hmasawn zelin, hmasawn zelna tur leh zir belh zel tur a awm tih hria ang u," a ti a; Mizoram tan ro ṭha hnutchhiah theihna atan golden jubilee chu hmasawn zual zel tumna hun ni se a duh thu a sawi.

Seminar hi Assembly speaker Lalrinliana Sailo-in a kaihruai a; speaker hlui Dr Kenneth Chawng­liana paper buatsaih 'Ram hma­sawnna tluantling nei tura legislature-te pawimawhna' tih leh Assembly secretary H Lalrinawma buatsaih 'Legislature leh executive' tih thupuite an sawiho.

Seminar-ah hian MLA, Former Legislators Association of Mizoram (FLAM) member-te leh sorkara hotu pawimawhte an tel. Mizoram Legislative Assembly golden jubilee lawm nan nizan khan cultural prog­ramme buatsaih a ni a, Gover­nor-in a hmanpui a ni.