Zirtirtute tan IT zirhona buatsaih
National Institute of Electronics and Information Technology (NIELIT), Samagra Shiksha, Mizoram leh Mizoram IT Society-te chuan nimin khan NIELIT-ah 'Capacity building of school teachers on IECT technologies' tih an buatsaih a, Human Resource Development Board vice chairman L Thangmawia, MLA-in a hawng.
L Thangmawia chuan, information technology (IT) chu zirnaah hman tam a ni dawn tih sawiin, "Ṭangkai zawka Mizoram zirnaa hman a nih theih nan zirtirtu leh office lama thawktute intuaihriam leh ṭan lak a ngai. Zirna lama technology hmang ṭangkai tura hmalakna hi Mizoramah thil thar ni loin, hun rei tak kal ta aṭanga SCERT-in a kalpui tawh a ni," a ti.
MLA chuan, Human Resources Development Board-in Planning Board kaltlangin sorkar laipuiah IT hmanraw mamawh phuhrûk nan Mizorama sikul hrang hranga hman tur smart class unit 1,000 leh virtual class unit 2,000 bunna atan cheng vbc. 154 a dil mek thu a sawi bawk.
Training hi zirtirtu 600 tana buatsaih a ni a, thawh ruka kalpui tur niin, batch tinah zirtirtu 100 zel tan kar khat awh training neih zel a ni ang. Batch hmasa ber hi May 9-13, 2022 chhung neih a ni dawn a, a thawh rukna chu July 18-22, 2022 chhunga neih tum a ni.