MADC-ah sorkar siam thei awm lo Bial 12 latu BJP-in an la tam ber

May 5, 2022-a 12th MADC General Election-a vote tlate chu nimin khan chhiar a ni a, party mala sorkarna siam thei an awm lo. MDC bial la tam ber BJP chu bial 25 zinga bial 12-ah an chak.

Vote hi chawhma dar 10 aṭanga chhiar ṭan a ni a, tlai dar 4:45 velah chhiar zawh a ni. Sorkarna fawng chelh mektu BJP chuan bial 12 an la a, sorkarna siam tura seat lak ngai 13 an la tling lo. MNF chuan seat pakua an la a, Indian National Congress-in seat pali lain, ZPM leh independent candidate zingah tling an awm lo.

MADC inthlanah hian bial 25 chuh turin candidate 85 an awm a; MNF leh BJP-in seat awm zawng zawng an chuh a, Congress party-in seat 23, ZPM-in seat pariat chuhin, independent candidate pali an awm a ni.