Sorkarin telhâwng a chìntir nuihzattute'n a ṭhatna an la hre dawn - Agri. Minister

Agriculture minister C Lalrinsanga chuan, SEDP hnuaia vaimim tharte hralhna tur an hriat lâwk thu leh sorkarin telhâwng a chìntir nuihzattute'n a ṭhatna an la hriat dawn thu a sawi.

Minister C Lalrinsanga hian nimin khan Mizo Hnam Runa inkhawmah thu sawiin, "Vaimim leh bekang hralhna turin Ministry of Agriculture kan dàwr a, price support min pek theih tur thu ṭawngkamin min tiam. Central-in 75% an tum dawn a, state-in 25% a tum ve thung ang. A lei turin MAHFED kan hmang thei ang," a ti.

Vaimim chu ar leh sangha châwmna atan hman theih a ni tih sawiin Minister chuan, "RKVY hnuaiah ran chaw siamna khawl Serchhipah kan din tawh a, district tinah ran chaw siamna khawl din turin hma kan la mek," a ti a; bekang herna kháwl leina tur an peih tawh thu te, khawlin bekang kg. 6-ah hriak litre 6 a her chhuah theih thu leh, bekang herna fû chu nutrela atan an hman zel dawn thu a sawi.

Telhâwng chungchang sawiin C Lalrinsanga chuan, "Telhàwng hi a hre chiang lote'n social media lamah an nuihzat a, Mizorama kan telhàwngte hi chuan damdawi lam a keng tel a, nakinah a ṭhatna hi nuihzattute hian an la hre chiang khawp ang. Kan sorkar chuan thil tê tham pawh ni se, kan ram economy ṭhatna turah chuan a ngai pawimawh zel dawn a ni," a ti.

Agriculture Minister chuan, SEDP-a fu thlangtute'n a hmunah an inrem tawh thu leh vai dailuah sen chi chu behliang dâla thlak an tum thu a sawi a, "Vai chawhmeh kan lei nasa lutuk hi eng emaw zat chu keimahni thar chhuaha intodelh kan tum a, WRC (leilet)-ah technology tharin nasa takin hma kan la mek a ni," a ti a; MNF sorkar hnuaia leiṭha an hman tur chu a ṭha danglam bik hle dawn a, CSIR siam OP.12 leiṭha bik an la lut dawn niin a sawi.

C Lalrinsanga chuan, MNF sorkarin term tàwp lam a hmang mek tih sawiin, "Kan bul ṭanna leh tun dinhmun thlirin kan vanduai hle. Covid boruakin kum hnih vel min nem ṭhu a, heti chung hian kan hotute'n theihtawp an chhuah a, mualpho leh harsa lutukin kan awm lo. A lehpekah sorkarna siam lehin, a vûr kum kan la thleng ang," a ti.