ZPM-in MADC-a tlingte lawmpui

ZPM party chuan thuchhuah siamin, Mara Autonomous District Council inthlana tlingte tih tak zeta an lawmpui thu an tarlang a, sorkarna siam turte chu sorkar kalphung thar, mipui sorkar din turin duhsakna an hlân.

MADC inthlanpui chu ZPM party pawhin bial pariatah an chuh ve tih sawiin ZPM chuan, "Thlan tlin awm pha rih lo mah ila, independent candidate, kan party-in kan thlàwpte nen vote ṭhahnem tak kan hmuh avangin Siaha district mipui chungah thinlung takin lawmthu kan sawi a ni," an ti a; Siaha district-a ZPM hruaitute leh member te, candidate-te leh duhsaktute an chhuan thu an tarlang.

ZPM chuan, kum 2023-ah Mizoram inthlanpuiah Siaha district mipuite chu politics kalphung thianghlim hmanga sorkar kalphung thar a pian theih nan thawh hlâwk ber nih tuma bei sauh sauh turin duhsakna an hlan bawk.