HCS bill táng pe chhuak turin phût

ZPM Ṭhalai chuan thuchhuah siamin, minister of state Robert Romawia Royte-in state sum thawh chhuah a tam thu a sawi laia February 2022 thla laihâwl thlenga Mizoram Health Care Scheme (HCS) hnuaia damlo mi 23,031 bill Rs 59,63,40,278 a táng si chu sum enkawl kawnga MNF sorkar hlawhchham tichiangtu a nih thu an tarlang a; HCS bill táng pe chhuak thuai turin sorkar an phût.

ZPM ṭhalaite chuan, "Minister of state Robert Romawia'n state sum thawh chhuah a tam thu te, tax revenue-a hmasawnna nasa tak a awm thu te, leiba kan neih tlem thute a sawi laia February thla laihâwl thlenga HCS hnuaia damlo mi 23,031 bill táng zat Rs 59,63,40,278 a ni si hian sum enkawl kawnga MNF sorkar hlawhchhamzia a tarlang chiang hle. Sum leh paiah hmasawnna nasa tak kan nei a nih si chuan, eng vangin nge MNF sorkar hian HCS-a inziah luh man a tihsân?" an ti.

ZPM Ṭhalai thuchhuah chuan, "Sum ngah sorkar intiin, HCS inziah luh man an tihsanah AAY pawh a zuah lo te, financial year khat chhunga kawlphetha hman man vawi hnih a tisangte khan MNF sorkarin mipui min rawk hreh lohzia a tilang chiang hle. MNF sorkar hian sum lama harsatna a nei lo a nih chuan SEDP pawh vaimim chî ang zawnga sem loin, an intiam angin chhung tinah cheng nuai thum sem ngei turin kan phût tlat a ni," a ti bawk.