CADC CEM RM Chakma paihthlak a ni

10th May, 2022

Chakma Autonomous District Council (CADC) chief executive member (CEM) Rasik Mohan Chakma kaihhruai sorkar chu nimin khan bûk a ni a, rin tawk lohna (no-confidence motion) paltlang zo loin a tla. CADC sorkar term kal mekah CEM pali an awm tawh.

CADC sorkara IPR department tarlan danin, nimin khan CADC budget session ṭan a ni a, CEM Rasik Mohan Chakma lakah CEM hlui Kali Kumar Tongchangya-a'n no-confidence motion a put luh avangin CEM chu bûk niin, CADC sorkar term kal mekah no-confidence motion a hmachhawn vawi hnihna a ni.

Nimin chawhma dar 10:30-a budget session ṭan hnu lawkah chairman Buddhalila Chakma-a'n chawhnu dar 1 thleng atan inkhawm a titawp lailâwk a; chawhnua session ṭan leh a nih hnuah CEM Rasik Mohan Chakma chu bûk niin, MDC 13-in an duh loh avangin a tla ta a ni. Vote laknaah hian Rasik Mohan Chakma telin MDC paruk an tel lo.