CMRF-ah cheng nuai 1,721 lut tawh Hman loh cheng nuai 895 a la awm

Chief Minister Office (CMO)-in record a neih danin, nimin thleng khan Covid-19 dona atan Chief Minister's Relief Fund (CMRF) for Covid-19 ah cheng nuai 1721 a lut tawh a, la hman loh cheng nuai 895 a awm. 

CMO aṭanga Vanglaini thu dawn danin, Covid-19 dona atan hian mimal, kohhran leh pawl hrang hrang 463-in CM Relief Fund-ah sum an thawh tawh a, chu'ng mite sum thawh tlingkhawm chu cheng nuai 1,721 a ni. Cheng nuai 1,721 aṭangin nuai 825 hman a ni tawh a, cheng nuai 895 hman a la ni lo.

CM Relief Fund hman dan tur hi Chief Secretary kaihhruai Committee on Utilization of Chief Minister’s Relief Fund for Covid-19 in an rél ṭhin a, Committee-in hmanna tura a tihahte CMO chuan pawisa an pe chhuak ṭhin. 

CMO-a thawkte chuan, CM Relief Fund chu langtlang taka hman a nih thu an sawi a, "Sum kan hman dawn apiangin IPR department kaltlangin kan puangzar zel a, a hmanna pawh IPR kal­tlang thoin kan puangzar ṭhin," an ti.

CM Relief Fund hi state páwna pawl hrang hrang, ramria duty, task force, home/rehabilitation, state páwna tangkhangte ei leh in, quarantine facility leh ramria duty vanga nunna chánte tan an hmang deuh ber a ni.