Green Mizoram Day thupui tur thlang

State Level Sub-Committee on Green Mizoram chuan kumina Green Mizoram Day thupui atan ‘Thingphun la, tuihnà siam rawh’ tih an rawt. Rawtna hi state level committee-ah thlen a ni ang.

Committee hi an chairman TJ Lalnuntluanga, Environment, Forests & Climate Change (EFCC) minister hoin nimin khan Secretariat conference hall-ah an ṭhukhawm a, kumina Green Mizoram Day hman dan tur an rêl a ni.

TJ Lalnuntluanga chuan, kumina Green Mizoram Day chu mumal taka hman tum a nih thu sawiin, "Mizoramah mai ni lo khawvel pumah tuihnâte a kang chak hle a, tuihna kan tihpun loh chuan hun lo kal zel turah tui kan harsa viau thei niin a lang. Pumpelhna ṭha ber chu tuihnate a pun theih nan thing phun uar a, lui hnára thing leh mau chereu tur ven leh humhalh a ni," a ti.

Ṭhutkhawmah chuan, Green Mizoram Day hmannaah tuihna humhalh leh tihpun nan thingphun uar a ṭulzia a zau thei ang bera puanzara mipui inzirtir te, Green Mizoram Day puala thing phun chu Tlawng kama hman te, DFO tinin lui hnâr leh lui kamah thing phun se tih te, Green Mizoram Day (June 11) chu Inrinni a nih avangin June 10, Zirtawpnia hman te, thupui atan ‘Thingphun la, tui hna siam rawh’ tih hmante an rawt a; rawtnate chu state level committee-ah la thlen leh tur a ni.

Meeting-ah hian EFCC secretary Jitender Kumar leh EFCC officer dang te, sorkar department ṭhenkhat aiawh te, NSS, ASEP, SENVA leh Green Mizoram Network aiawhte an tel.