Siaha & Lawngtlai dist-ah hripui vei awm lo

May 8, Pathianni khan Mizoramah Covid-19 vei mi 16 hmuh chhuah a ni a, 2022 chhunga hmuh tlem ber ní a thleng leh. Nimin khan hripui vei dam tawh mi 59 chhuahtir an ni a, Siaha leh Lawngtlai district-ah hripui vei an awm rih lo. A záwnin ni sarih chhung Covid-19 vei thi an awm tawh lo.

Pathiannia Covid-19 vei hmuh tharte chu mipa panga leh hmeichhia 11 an ni a, RAT hmanga hmuh vek niin, positivity rate chu 6.34% a ni.

Ni sarih chhung a zawnin Mizoramah Covid-19 vanga thi an awm tawh lo a, thi an awm hnuhnun ber chu May 2, 2022 kha a ni.

IDSP record angin, Mizoramah Covid-19 vei 2,27,736 hmuh chhuah a ni tawh a, mipa 1,06,044 leh hmeichhia 1,21,602 an ni a, mipa aiin hmeichhia 15,656-in an tam zawk. Nimin tlai dar 5 thleng khan mi 2,26,863 (99.62%) chhuahtir an ni tawh a, mi 697 (0.31%) thi tawhin, enkawl mek mi 176 (0.09%) an awm.

Nimin tlaia Covid-19 vei enkawl lai mi 176 chiah awm chu kum khat chuang hnua hripui vei enkawl lai an awm tlem ber lai a ni a, April 13, 2021 tlai khan active case mi 174 an awm a ni.

Mizorama district zawng zawngah hripui vei inenkawl lai mi 60 awm tlinna a awm rih lo a, enkawl lai tamna ber Aizawl district-ah mi 55 an awm. Siaha leh Lawngtlai district-ah positive an awm rih lo a; Champhai, Hnahthial, Kolasib leh Khawzawl district-ah positive enkawl mek mi 10 aia tlem ṭheuh an awm mek.

Kum 2011 chhiarpui aṭanga chhûtin, Mizorama Covid-19 vei hmuh tawh 2,27,736 chu mi 1,000 zelah hripui vei mi 207 an awm ang a ni a; mi 1,00,000 zela Covid-19 vangin mi 63 an thi tawh ang a ni tih sorkar thuchhuakin a tarlang.