Kuthnathawktute Ni ; Deptartment hotute'n tan an lak chuan Ei leh bârah kan intodelh thei - Hawla

Mizoram sorkar bultumin nimin khan Mizorama hmun 40-ah Kuthnathawktute Ni hman a ni. A hmanna pui ber Aizawlah chuan chief minister Lal Thanhawla hoin Lal Thanhawla Auditorium-ah hman a ni a; CM Hawla chuan, sorkar department hotute'n ṭan an lak lehzual chuan Mizoram chu ei leh bara intodelhna ramah siam theih a nih thu a sawi.

Kuthnathawktute Ni puala inkhawm buatsaih hi chief secretary Lalmalsawma'n a kaihruai a; Lal Thanhawla chuan, sorkar officer kalkhawmte fuihin, "Mizoram hi a boruak a ṭha a, thlai chi tin ṭhat duhna ram a ni. Department hotute'n tun aia ṭan in lak lehzual a, mipuite kawng dik in kawhhmuh a, mahni aia mipui in dah hmasak chuan ei leh bar leh sum leh paia intodelh ram kan ni ngei ang," a ti.

Chief Minister chuan, Mizoram chu tlang­ram chhengchhe tak, ram kilkhâwra awm nia sawi ṭhin chu tibo turin ruahmanna siam mek a nih thu sawiin, "Bangladesh border trade kan siam dawn a, Myanmar nen border trade ṭha tak kan nei tawh. Sum­dawnna kawtchhuah tur buatsaih mek zel a ni," a ti a; sorkar kaihruaitute'n ram hmasawnna atan ruahmanna ṭha tak tak an neih thu a sawi.

NLUP nodal minister (Agriculture minister) R Lalzirliana pawhin thu sawiin, kum ruk kal ta chhunga NLUP-in hmasawnna kawnga a thawh hlâwk dan ngaihtuahin, hlawhtlinna awmte chu a lungawithlak hlea a hriat thu a sawi a, "Heng hlawhtlinnah hian kut hnathawktute thawhrimna bakah sorkar hnathawkte kawng kawh­hmuhna a lang a ni," a ti.

R Lalzirliana chuan, NLUP-in harsatnate tâwk mah se, chu'ng harsatnate chu malsawnnaah chantir a ni tih sawiin, "Tunah chuan kan beisei phak loh thil tam tak kan ban phâkah a awm tawh a, mahni thawh chhuaha Zoram thar siam turin ka duhsakna kut hnathawktute ka hlan a ni," a ti a; kut hna­thawktute chu ṭhahnem­ngai leh taima lehzuala thawk turin a chah.

Inkhawmah hian Planning secretary Dr C Vanlalramsanga'n NEDP chungchang a sawifiah a; NLUP Implementing Board vice chairman PL Thanga'n NLUP chung­chang a sawifiah thung.

Kuthnathawktute Niah hian Mizoram sorkarin Mizoram hmun hrang hranga Kuthnathawktute Ni hman turah gazetted ofiicer zawng zawng chu tel vek tura a hriattir angin, officer ṭhahnem tak an tel a ni.

Kuthnathawktute Ni hmanna inkhawm ṭan hmain CM Lal Thanhawla chuan Vanapa Hall kawtah Commerce & Industries department aṭanga NLUP hnuaia auto-rickshaw semte a vailiam.

NLUP auto-rickshaw sem dawngtute chu - Tuichawng bial aṭangin mi panga, Lawngtlai West bial aṭangin mi panga, Lawngtlai East bial aṭangin mi pali, West Tuipui bial aṭangin mi panga, South Tuipui bial aṭangin mi pali, Thoráng bial aṭangin mi pasarih, Mamit bial aṭangin mi pasarih, Hachhek bial aṭangin mi 10, Dampa bial aṭangin mi paruk, Palak bial aṭangin mi pali leh Siaha bial aṭangin mi pakhat an ni.

Chief Minister-in a vailiam hnuah auto-rickshaw sem tak 58-te chuan Aizawl khaw­pui an fang kual a ni.