Mizoram sorkarin Mizo zirlai 32 a tirhna NIAS, Kolkata fake intitution-a puan a ni

Mizoram sorkar tirha a Nalanda Institute of Advance Studies (NIAS), Kolkata-a Bachelor of Hotel Management (BHM) zir zinga mi C Laltlanmawia chuan, nimin khan Aizawl Press Club-ah thuthar thehdarhtute kâwmin, NIAS, Kolkata chu zirna in lem (fake institute) a nih thu leh Mizoram sorkar nena thuthlung an ziah anga enkawl an nih loh dante a sawi.

C Lalthanmawia sawi danin, NIAS, Kolkata-a BHM zir tur zawn nan Mizoram Building & Other Construction Workers Welfare Board (MBOCWWB) Secretary-in August 6-8, 2014-ah Vanglaini chanchinbu-ah advertisement a chhuah a, Labour, Employment and Industrial Training Director pisaah interview neih a nih hnuah mi 32 thlan an ni.

August 29, 2014-ah zirlai 32-te thlahna hun hman a ni a, MYC chairman T Sangkunga, MLA-in a hmanpui. Zirlaite hian September 3, 2014-ah Aizawl an chhuahsan a ni.

C Lalthanmawia chuan, NIAS, Kolkata chu West Bengal sorkarin zirna in lem (fake institution) a puan zingah a tel tih sawiin, "Fake institution-a tirh kan ni hi a ná kan ti hle a, zir chianna awm loa sum siamna atan mai nia ngaih theiha Mizo ṭhalaite min tír hi thil rapthlak tâwpkhâwk leh kan career tihchhiatna a ni," a ti.

Website http://peperonity.com/sites/ed... ah West Bengal sorkarin zirna in lema a puante chu en theih a ni a, NIAS, Kolkata hi no. 15-naah ziah lan a ni. Mizo zirlai 32-te hian NIAS hi an zir zawh hmain chhuahsan vek tawh.

Zirlaite'n NIAS, Kolkata an thlen chuan, an kal hmaa an sawi nen thil awm dan a inang lo hle tih sawiin, C Lalthanmawia chuan, "Hostel nuam tak an website-a an tarlan laiin, a takah chuan room chêp takah mi pathum/palite min khung khawm a, study table pawh a awm lo. Chaw eina pindan a awm lo a, in chung zawlahte chaw kan ei mai ṭhin," a ti.

MYC thuchhuah, December 23, 2016-a chanchinbua lang, NIAS, Kolkata-a zir tura Mizo ṭhalaite tirhnaah MYC-in inrawlhna a nei lo anga an tarlang chu C Lalthanmawia chuan, "An hmingchhe tur thup tumna mai niin a lang," a ti.

August 4, 2014-a Mizoram sorkar leh NIAS-in MoU an ziahah MYC hming a lang a, MYC Superintendent signature a awm thu leh August 29, 2014-a anmahni thlahna chungchanga sorkar press release-ah pawh MYC bultum a nih thu ziah a nih thu a sawi.

Mizoram sorkar leh NIAS MoU point no. 2.5 leh 2.6-ah, zirlai dam lote NIAS-in a ṭul angin a buaipui ang a, senso chu zirlaite aṭanga hmuh lêt a theih loh pawhin MYC aṭanga hmuh let tur tih ziah a nih laiin, damlote NIAS-in an buaipui ngai loh thu leh MYC pawhin an ṭanpui loh thu a sawi.

C Lalthanmawia chuan, zirlai 32-te kum thum chhunga zirna senso atan Mizoram sorkarin cheng nuai 128.20 a pe tih sawiin, Mizoram an chhuahsan hnu lawka kum thum zirna senso tur pek tlak nghal vek a ni chu mak an tih thu a sawi.

RTI Act hmanga zawhna LEIT SPIO-in a chhan danin, zirlai 32-te'n NIAS-a zir tura Mizoram an chhuansan hnu lawkah zirna senso tur chu MBOCWWB Secretay-in MBOCWWB sum a pe nghal a; August 4, September 15 leh 16-ahte pek a ni.

NIAS, Kolkata-a Mizo zirlai­te harsatnate leh MoU ang loa thil a kal chu LEIT minister Lalrin­mawia Ralte, MYC chairman T Sangkunga, LEIT director Rotluanga, MYC superintendent Lalsawmzuala leh MBOCWWB assistant welfare commissioner Francis Lianmawia te hnenah vawi eng emaw zat an thlen chungin awmze neia hmalakna a awm lo tih sawiin, Chief Minister hnenah pawh ziakin an thlen.

C Lalthanmawia hian October 26, 2016-ah Anti Corruption Bureau-ah FIR a thehlut a. A sawi danin, FIR thehluh hi ACB-in October 28, 2016-ah Vigilance department-ah an thawn a; chumi hnuah Vigilance department chuan LEIT Secretary chu insawifiah turin a ti a, tun thlengin LEIT Secretary hi a la insawifiah lo.

LEIT department, MYC leh MBOCWWB hotute'n Mizo zirlaite sum siam nan an hmang ni ngeia a hriat thu sawiin, ACB-in chhui chhuak ngei se a duh thu, C Lalthan­mawia chuan a sawi bawk.