Fire Audit Team-in damdawi-in an tlawh
Mizoram Fire Audit Team chuan, nimin khan a thawh khatna atan State Referral Hospital, Alpha Hospital leh Kulikawn Hospital-te an tlawh a; chhiatrupna a thlen palh cháng leh kângmei a chhuah palha tawrhna tihziaawmna leh himna kawnga an hmalaknate an enfiah.
Aizawl DC leh Aizawl District Disaster Management Authority (ADDMA) chairman Kannan Gopinathan chuan Disaster Management Act, 2005 Section 30(2)(v) hmangin Aizawl district chhunga sorkar leh mimal damdawi-in zawng zawngah Fire Audit neih vek tûrin thuchhuah a siam a; chumi en zui tur chuan Fire and Emergency Services leh Hospital & Medical Education department-te chuan Fire Audit Team an din a ni.
Fire Audit Team-ah hian Fire & Emergency Services SP J Lalṭhafamkima'n a kaihruai a, Health department Disaster Management-a state nodal officer Dr Robert L Khawlhring, Fire & Emergency Services-a station officer Lalremtluanga Varte leh damdawi-in tina medical superintendent aiawhte member-ah an awm.
Fire Audit Team hian Aizawl district-a damdawi-in zawng zawng tlawh chhuakin, kângmei leh chhiatna dang laka damlote leh damdawi-ina awmte himna tura damdawi-in hmalak dan an enfiah dawn bakah, kâng ṭhelhna hmanrua nei tur ṭulte leh himna tura hmalak dan turte an ruahmanpui dawn a ni.
A hmalakna bul ṭanna atan Fire Audit Team hian nimin khan State Referral Hospital, Kulikawna Apha Hospital leh Kulikawn Hospital-te an tlawh a; damdawi-inah kângmei a chhuah palha himna tura hmalak dan turte an hrilh a ni.