Hnianghnâr zawka tui sem dan tur sawiho

Public Health Engineering minister Zodintluanga hoin, Nilaini khan Secretariat conference hall-ah UDPA, PHE leh SIPMIU hotute'n Aizawl khawpuia mipuiin hnianghnâr zawka tui thianghlim an dawn theih dan tur an sawiho.

Zodintluanga chuan, department hrang hrangte'n tum thuhmun neia hna an thawh ṭheuh laiin, inhriatpawh loh vangin hna insu buai leh project insiam thuah a awm palh theih thu a sawi a, "Sâwt zawka department-te'n mipui tana hna an thawh theih nan inpawh tlang taka thawhho a ṭul," a ti.

Meeting-ah hian SIPMIU hotute'n Aizawl khawpuiin hnianghnâr zawka tui a hmuh theihna atana an hna thawh mek, thawh zawh tawh leh thawh hmabakte an sawifiah. PHE-in pipeline an siamṭhat mek nen insu buai loa hna thawh tur duan chin an inhriatsak theih nan te, hna thawh tur duan lâwk fiah taka thliar a, SIPMIU leh PHE thawh tur chin tihchian dan tur an sawiho.

Meeting-a an rèl dan chuan, PHE leh SIPMIU-te chuan SIPMIU Project Director kaihhruaina hnuaiah thla hnih danah an hnathawh dan thlirhona meeting nei an nei ṭhin ang. SIPMIU aṭanga tih tur duan lâwk zawng zawng chiang taka hriat a nih hnuah a la bâng tih tur awm apiang blueprint siam a ni ang a, a pawimawh dan indawtin hna thawh tur hmabakte chu kawng dang aṭanga sum ngaihtuah a thawh ṭhin tum a ni.