Mizoram SSA document ziah danglam a ni : CM

Chief minister Lal Thanhawla chuan, Mizoram SSA-in sum hman dan tura ruahmanna an siam 'document-ah' MLA pakhat leh sorkar hnathawkte'n thil an ziah belh niin a sawi.

Nimin khan Congress Bhavan-ah thu sawiin Chief Minister chuan, "SSA hlawh pek dan tur inziahnaah MLA pakhat leh sorkar hnathawkte'n August leh September tih an ziah belh. Khati khawpa rilru chhia an pú kha a pawi hle," a ti.

Lal Thanhawla chuan, eptu MLA chuan dâwtin sorkar bei duh ma hse a zia deuh tih sawiin, "Sorkar hnathawk zinga a lo thurualpui duh an lo awm hi a pawi hle a ni," a ti a; MLA lo thurualpuitu sorkar hnathawk chu engtin nge an tih dawn a la hriat loh thu a sawi.

SSA hnathawkte'n amah chu ultimatum an pek thu sawiin CM Hawla chuan, "Ultimatum hi mi an vauna, ni 10 chhunga 'Chuti chuan i tih loh chuan' in tihna a ni. Ka dawn ní là lâin lehkha ka ziak a, an mi vauna hi ka pawm thu ka hrilh," a ti.

SSA hnathawkte chuan an sawi anga engmah an la tih loh thu sawiin Lal Thanhawla chuan, "Eng nge an tih dawn ka hre lo. An tih ang zelin ka ti ve ang," a ti a; SSA hnathawkte chona chu a pawm thu a sawi.

Chief Minister chuan, a kaihhruai sorkarin hmasawna lama nasa takin hna a thawh thu sawiin, "Kan la mamawh chu khawtlang nun siam ṭhat a, kan ram ei leh bar leh sum leh paia intodelh atana siam a ni. Chumi atan chuan NEDP duan a ni," a ti.

CM Hawla sawi danin, Mizoram sorkarin a duh ber chu mi hausa leh retheite inkar zau lo se tih a ni a, a hnuaihnung bera inngaite pawhin lei rem rap se an duh a ni.