Kum 2016 chhungin TB vangin mi 29 an thi

Revised National TB Control Program (RNTCP) chuan, nimin khan IPR directorate conference hall-ah ngawr (TB) donaa hna thawh dan thlirletna, Quarterly Review Meeting an buatsaih. Kum 2016 chhungin TB vei hmuh chhuah mi 775 an awm thu leh, TB vangin mi 29 an thih thu tarlan a ni.

Review meeting hi state TB officer Dr Vanlalfela'n a kaihruai a; district hrang hranga TB officer te, TB lam khawihtu medical officer-te leh State TB Cell-a thawkte an tel.

Dr Vanlalfela tarlan danin, kum 2016 chhung khan TB vei nia rinhlelh mi 8,961 endik an ni a, chung zinga mi 775 chuan TB an vei tih hmuhchhuah a ni. TB vei zinga 88.25% chu enkawl dam an ni a, TB vei na zual bik MDR-TB mi 45 an awm a; TB vangin mi 29 an thi a ni.