Kolasib district-ah December 2016 chhungin HIV+ve 23 hmu chhuak

Mizoram Legislative Forum on HIV/AIDS thutlukna bawhzuiin nimin khan Kolasib DC H Lalengmawia hoin a pisaah Kolasib district-a HIV/AIDS darh zel tur venna atana hmalak dan tur sawiho a ni. December 2016 chhungin HIV+ve hmuhchhuah thar mi 23 an awm tih tarlan a ni.

Meeting-ah hian, Kolasib district-ah HIV/AIDS kai thar an punga hriat a nih avangin hmalak hma a ṭul tih an sawi a; chuta tan chuan awareness campaign uluk leh zuala kalpui leh a bikin kum 15-24 inkara hmalak hmasak a ṭul thu an sawi.

Mahni dinhmun hriat nan leh HIV veite'n inenkawlna an dawn hma theih nan thisen enfiahtir tura inzirtirna uar zawka kalpui dan tur an sawiho a; chumi atan chuan a bul ṭan nan Kawnpuiah hmalak an rel a ni.

Kolasib district-ah hian December 2016 chhung khan mi 435-te thisen enfiah niin, HIV positive mi 23 hmuh chhuah a ni a, HIV+ve zinga pahnih chu nau pai an ni.

Nikum December thlaa HIV+ve hmuh chhuah zingah mipat hmeichhiatna aṭanga kai mi 10 an awm a; hriau thianghlim lo inhman ṭâwm aṭanga kai mi 11 an awm bawk.