Hostel-a naupang khuaikhem ṭhina puh Sorkarin a hostel titawp turin a hriattir

School Education department chuan MacDonald Hill, Zarkawta hostel/residen­tial tuition camp siamtu Henry Lalmalsawma, Home Mission School chu a hostel/residential tuition camp tihtawp nghal turin a hriattir. Henry Lalmalsawma lakah hian thubuai ziah luh a ni bawk.

Hostel/residential tuition camp titàwp nghal tur hian School Education Director chuan January 16, 2017 khan Henry Lalmalsawma hnenah hriattirna a pe a; "Inspection report-ah i zirlaite lakah mawi lo takin i che ṭhin tih hriat a ni a, hostel chungchanga sorkarin dan leh hrai a siamte i zawm loh bawk avangin i hostel/residential tuition camp hi titawp nghal tura hriattir i ni," tiin a ziak.

School Education Director-in hriattirna a peka an ziah danin, henry Lalmalsawma hian phalna nei loin zirlaite tan hostel/residential tuition camp a siam a, a hostel-a awmte chu mipat hmeichhiatna hawia a khawih ṭhin bakah, chumi vang chuan a lakah thubuai ziah luh a ni.

School Education department-in report an dawn hnuah department hotute'n an enfiah a; residential tuition camp chu student hostel nen a danglamna a awm lo tih hmuh a ni.

Hostel ang ni siin Mizoram School Hostel Infrastructure, Facilities and general care of Students (Management) Rules, 2016 a bawhchhiaa ngaih a ni.

Thu dawn danin, Henry Lalmalsawma hian nikum November thla khan a zirlai pakhat damsam lo, damdawi a pek hnua a khawih vel lai hmutu an awm a, chumi hnuah naupang a khawihte thlalak darh a awm zui a ni. Chuta ṭang chuan zirlai eng emaw zat chu hlauhthawngin an awm a, zirlai eng emaw zat chuan hostel chu an chhuahsan a ni.

Henry Lalmalsawma hi thubuai siamsak a nih hnuah bail-in a awm a, January 12, 2017 khan a bail chu Court-in an sûtsak. He thu ziah lai thleng hi chuan Lalmal­sawma hi police-in an la man lo nia thu dawn a ni bawk.