NIAS-a zirlai tirhah MYC a inrawlh lo - MYC Chairman
Mizoram Youth Commission (MYC) chairman T Sangkunga, MLA chuan, Nalanda Institute of Advance Studies (NIAS), Kolkata-a Mizo zirlai 32 tirhah MYC-in mawhphurhna an nei lo niin a sawi. Hetih lai hian, NIAS zir chiang turin Labour Employment & Industrial Training (LEIT) Secretary chu Kolkata-ah tirh a ni.
T Sangkunga hian nimin khan Congress Bhavan-a inkhawmah thu sawiin, "NIAS leh Labour Welfare Board chuan inremna siamin, zirlaite hi an tir a ni. A thlannaah pawh kei pawh ka tel a, ka phûr khawp mai. Mahse, MYC chuan NIAS-a zirlai tirhah hian mawhphurhna leh inhnamhnawihna engmah kan nei lo. Labour Welfare Board-te nen hian kan thawhho ṭhat avangin, zirlai an thlahnaah pawh phûr takin thu ka sawi a ni," a ti.
MYC Chairman sawi danin, NIAS, Kolkata-a zir tur zirlaite thlah an nih ṭumin sorkar press release-ah khuallian Law Commission chairman John Siamkunga'n zirlaite chu MYC tirh angin a sawi nia tarlan a ni a; nimahsela MYC-in inhnamhnawihna an nei lo a, sàwm a nih angin thu a sawi ve a ni.
T Sangkunga sawi danin Labour Welfare Board leh NIAS-te'n inremna an siamah hian MYC hming a lang ve a, mahse, hriatpuitu ang chauhin a ni. Hei hi an naute'n MYC hriatpuina ni loa an lo tih a ni a, MYC aiawha hming lo ziaktu hi hrem tum ni mah se, a concern minister nen sawiho a nih hnuah ngaihdam a ni.
NIAS, Kolkata-a kalte chuan rei vak loah harsatna an tawh thu sawiin T Sangkunga chuan, "Pawi deuh chu, Labour Welfare Board hian NIAS hnenah kum thum atana zirlaite senso tur an pe lâwk a. Pawisa an dawn lâwk avang hian NIAS lam hian an tih tur an tih ṭhat loh phahin ka hria," a ti.
MYC Chairman chuan, NIAS-a zirlai C Laltlanmawia'n a lungawi lohna a sawi chhan nia a hriat sawiin, "C Laltlanmawia hian agreement anga medical reimbursement a bill theih loh avangin a lungawi lo hle a, ka hnenah pawh a lo kal. Mahse, damdawi-ina a awm dawn leh a awm hnuah pawh engmah a hriattir loh avangin Labour Welfare Board chuan MR bill an pe lo," a ti.
T Sangkunga sawi danin, NIAS hi Kolkata-a university pakhat nena inzawm, study centre pakhat nia sawi a ni. Hetih lai hian, chu university zir chiang tur leh zirlai exam hmachhawn thei lote'n exam an hmachhawn theih dan tur buaipui turin LEIT Secretary chu Kolkata-ah a chám mek a ni.