KHAWTHLIR

MJA General Headquarters chuan vawiin Thawhṭanni chawhnu dar 1 hian Aizawl Press Club-ah kum thar 2020 lawmna thingpui inho pahin MJA member tharte lawm luhna leh press tour-a zinte report pek inkhawm an buatsaih dawn. He hunah hian MJA chuan Ai­zawla MJA member zawng zawng bakah, district-a MJA member, Aizawla awm mekte chu tel vek turin an chah a ni.

Disaster & Ma­nagement department chuan January 10, 2020 khan Hyve Hall-ah an hnathawh thlirlêtna leh inhlan tharna hun an hmang a, DMR minister Lalchamliana’n a hmanpui. Lalchamliana chuan, department-a thawkte chu sorkar leh mipuite'n ṭangkai taka an chhawr theih nan thawhhona ṭha vawng zel turin a chah a, "Mahni thawh chhuah ni lo sum ît lo a, lungawi leh rinawm taka mahni hna ṭheuh thawh a pawimawh," a ti. Inkhawm hi DMR jt. secretary Ramdinliani'n kaihruaiin, director Lalnunhlua pawhin thu a sawi.

Lunglei High Power Committee vice chairman Lawmawma To­chhawng chuan Lunglei Traffic Police-te'n an hmanraw mamawh a hnena an thlente bawhzuiin January 10 khan Lunglei SP C Lalthanmawia hnenah traffic police-te hman atan wheel lock 30, traffic baton light 30 leh search light pahnih a hlan.

Nimin Pathianni khan Mizoram chhung leh páwn hmun hrang hrangah Mizoram Synod hnuaia pastor leh probationary pastor insawnte an awmna thara lak luhna inkhawm (induction) neih a ni. Pastor/pro.pastor induction hi pastor/minister vêkin an neihpui ṭhin a, Mizoram Synod puipate pawhin pastor bial hrang hrang­ah an neihpui a ni.

Mizo National Front (MNF) leh Mizoram Pradesh Congress Committee (MPCC) chuan vawiin hian kumin atan an party pisa - Mizo Hnam Run leh Congress Bhavan an hawng dawn. Bhavan hawn inkhawmah hian MPCC president Lal Thanhawla'n thu a sawi dawn a, Mizo Hnam Run­ah chuan MNF presi­dent leh chief minister Zoramthanga leh Lok Sabha MP C Lalrosanga ten thu an sawi ang.