KHAWTHLIR

Property return zirho
Vigilance department chuan, nimin khan Lawngtlai DC Conference Hall-ah sorkar hna thawk group A leh B-te tan Property Return zirhona an buatsaih. Training-ah hian Lawngtlaia sorkar hnathawk officer 70 chuang an tel a; Vigilance department-a course director Vanlalzuala Chhangte, assistant James Lalchhuanawma leh F Zodinpuia ten kum tina an thil neih zat sorkara hriattirna (annual property return) an thehluh dan tur an zirtir a ni.

Thilpek hlan
State Bank of India, Siaha branch chuan nimin khan corporate social responsibilities aṭangin Siaha District Hospital-a hman turin stretcher (inzâwnna) leh wheelchair pali ve ve an pe. Thilpek inhlanna hun hi Siaha DC conference hall-ah neih a ni a, DC Harleen Kaur-i'n a hmanpui.

Essay inziahsiak
Mamit Higher Secondary School-ah nimin khan 7th. National Voters Day 2017 pualin essay inziahsiak buatsaih a ni. Essay competition thupui chu 'Empowering young and future voters' tih a ni a, high school
aṭanga college zirlaite tana buatsaih niin, Mamit khawpui chhunga zirlai 32 an tel a ni.

MP-in chawimawi
Madhya Pradesh sorkara Forest Department chuan, Mizoram sorkara Environment, Forest & Climate Change department nen ṭangkawpa saphu káwr tawlhrûk man chhuak tura an thawhhonaa thawh
ṭhat vangin, Kolasib range officer C Lalrinmuana hnenah Certificate of Excellence an hlan.

Infiamna kûtpui
January 19-20 chhunga North Vanlaiphai khelmuala Serchhip district huap Mizo Infiamna Kutpui (Mizo Traditional Games 2017) chu nimin khan khar a ni a, Mizoram State Women Commission chairperson Vanlalawmpuii Chawngthu, MLA-in a khârna inkhawm a hmanpui. Games-ah hian Chekâwn, Lungkawlh, Bâwktlang, Cherhlun, Serchhip leh North Vanlaiphai aṭangin mi 240 an tel a ni.