Nau tihtlâk tihtawp a nih theihna tura din State Supervisory Board an thukhawm

Nau pai laia tihtlâk tihtawp a nih theih nana hma la tura din, Pre-Conception and Pre-Natal Diagnostic Techniques Act, 1994 (PCPNDT Act) hnuaia State Supervisory Board chu an chairman Lal Thanzara, Health minister hoin nimin khan CMO conference hall-ah an ṭhukhawm.

PCPBDT Act hi nu pum chhunga nau pai chu mipa nge hmeichhia a nih hriat lâwk leh nau tihtlâk (female foeticide) awm ṭhin tihtawp a nih theih nana duan a ni a; sorkar laipuiin India ram mipui sex ratio (mipa leh hmeichhia intlukna zat) tlahniam lutuk tur ven nana a siam a ni.

Meeting-ah hian Mizorama PCPNDT Act kalpui dan leh chumi hnuaia tih tur hrang hrangte tihhlawhtlin a nih dan sawiho a ni a; danin a phût anga Ministry of Health & Family Welfare hnena Quarterly Progress Report thehluh tur thlirho a ni bawk.

State sorkarte Appropriate Authority leh Advisory Committee din tura beisei a nih angin Mizoramah pawh December 4, 2015 khan Health & Family Welfare Directorate hnuaiah Appropriate Authority din a ni a; Appropriate Authority hian ultrasound centre hrang hrang registration te, training pek leh enfiah hna an kalpui ṭhin. Advisory Committee pawh May 26, 2016-ah din a ni a, thla hnih danah an ṭhukhawm ṭhin a ni.

Tun dinhmunah Mizorama ultrasound centre, PCPNDT Act hnuaia inzia klut zat chu 40 a ni a, chu'ng zinga 11 chu state sorkar hnuaia awm an ni.

PCPNDT Act-in inkaihhruaina a duan (standard operation guidelines)-te zawm a nih leh nih loh chu State Inspection & Monitoring Committee (SIMC)-in an enfiah thin a; October 17-21, 2016 chhung khan inspection neih niin, ultrasound centre 18 an enfiah a ni.