NIAS-a Mizo zirlaite harsatna MZP-in pawi ti

MZP chuan thuchhuah siamin, Mizoram sorkar tirha Nalanda Institute of Advance Studies (NIAS), Kolkata-a Bachelor of Hotel Management (BHM) zir tura kal Mizo zirlai 32-te'n harsatna an tâwk chu pawi an tih thu an tarlang a; NIAS-a Mizo zirlaite'n harsatna an tawh chungchanga FIR thehluh tawh chu bawhzui a, thil dik lo titute hrem ngei turin Mizoram sorkar an ngen.

MZP chuan, NIAS, Kolkata chu institution mumal tak ni loin, study centre ang chauh a ni tih sawiin, "Registration an neih pawh kum 2014 khan a tawp tawh a. NIAS hian degree pangngai pe chhuak thei loin, distance institution nei chauh an ni," an ti.

Mizo zirlaite sum siam nana thuneitute'n an hmang ṭhin chu an hrethiam lo hle tih sawiin, state páwnah zirlaite tirh chhuah an nih dawn chuan zirna in rintlak leh felfai tak ni thei se an duh thu an sawi.

NIAS, Kolkata-a BHM zir tura tirh Mizo zirlaite'n harsatna an tawh chungchangah FIR thehluh tawh chu chhui chhuah ngei an duh thu sawiin MZP chuan, "Thil tisualtute dan anga hrem an nih ngei theih nan Mizoram soarkar kan ngen a ni," an ti a; NIAS-a kum thum chhung zirna tura ni 11 chhung leka zirna senso tur zawng zawng cheng nuai 128.20 sorkar­in a pe chhuak thei chu mak an tih thu sawiin, a rang lama chhui chiang turin Mizoram sorkar an ngen a ni.