Mizoram SSA document páwn lam mi tihdanglam a ni lo - MLA Lalruatkima
MNF party MLA Lalruatkima chuan, Mizoram SSA-a thawkte hlawh tur dilna lehkha (document)-a kutziak lang chu páwn lam mite tihdanglam a ni lo tih MLA pahnihin an finfiah niin a sawi.
Nimina Mizo Hnam Rûna inkhawmah Lalruatkima chuan, SSA sum dilna lehkha enfiah turin January 18, 2017-ah MNF treasurer Vanlalzawma, MLA nen Finance department-ah an kal thu sawiin, "File document hi kan enfiah vek a, document hi páwn lam mite'n an siam danglam lo tih kan finfiah," a ti.
Lalruatkima chuan, sorkar inthlahdah vangin SSA-a zirtirtute'n thla nga chhung hlawh an la thei lo nia sawiin, sorkar chu zirna ngaihthahah a puh a; a rang thei ang bera SSA-a thawkte hlawh pe turin sorkar an phût tih a sawi.
MNF MLA pahnih - Lalruatkima leh Lalrinawma bakah, MNF hruaitu ṭhenkhat chuan nimin khan Mizoram SSA state project director Lalhmachhuana chu a pisaah an kâwm a; SSA State Project Director chu SSA zirtirtute hlawh pek a nih dan a sawifiahnaah ruling MLA-te chauh pek a nih chhan te, SSA lehkha pawimawh tihdanglam chu a tidanglamtu zawng chhuak tur leh SSA account-a sum la awm zatte January 28, 2017 hmaa sawifiah turin an phût a ni.