Covid-19 vei lo tih finfiah tawh Siaha mi pakhatin a vei tih hmuh chhuah a ni

Siaha district-a tlangval pakhat chu Covid-19 hripui a vei lo tih finfiah a nih hnuah endik nawnnaah hripui a vei tih hmuh chhuah a ni. He tlangval swab sample hi Zoram Medical College (ZMC) Covid-19 laboratory-ah June 21, Pathiannia endik nawnnaah Covid-19 a vei tih an hmu chhuak. 

Siaha aṭanga thu dawn danin, sorkar quarantine centre - Lorraine School-a room no. 5-a awm mi 10, Delhi aṭanga hawte chu June 4, 2020-ah an swab sample lak a ni a. ZMC-ah endik niin sample lak aṭanga ni 10 hnu, June 14-ah result hriat a ni a, mi pakhat a positive tih hmuh chhuah a ni a, mi dang pakuate chu an negative thung. 

June 14-a mi pakhatin hripui a vei tih hmuh chhuah a nih hnuah mi dang pakuate chu June 15-ah lak chhuah nghal an ni. 

Heng mi pakuate hi June 16-ah swab sample lak nawn leh niin, June 21, Pathianni khan endik an ni a; an zinga pakhat, June 14 result-a (June 4-a swab sample lak) negative tawh si chuan Covid-19 a vei tih hmuh chhuah a ni leh ta a ni. 

Vanglaini palaiin a biaknaah Siahaa hripui vei hmuh chhuah hian, a taksaah harsatna a nei lo a, amahah Covid-19 symptom a lang lo tih a sawi. June 21-a result chhuakah Siaha district mi 30-te result a chhuak a, mi dangte chu tute nge an nih a hriat loh thu leh, quarantine centre-a a awmpuite result dinhmun an la hriat loh thu a sawi bawk. 

Siaha district mi Covid-19 vei hmuh chhuah hian a thil tawn hi social media-ah a ziak a, "...Siaha quarantine center chu 1st June-ah thlamuang takin ka lut ve ta. June 4-ah swab test an lo nei a, mahse, result erawh kan nghak rei ta lua... thil pawi tur a pawi zo ta. June 14-ah daih result a chhuak a, vanneithlak takin ka negative. Mahse, ni 10 chhung chu positive-te ho nen kan lo cheng dun ta reng mai... June 15-ah center dangah min sawn a, June 16-ah swab test an lo neih leh a, June 22 result chu ka lo positive ve ta. Test result-te hi chhuak hma ta se public transmission a awm kher ang em?" tiin a ziak a ni.

Swab sample lak hmasaka negative ni si, an zinga mi positive nen ni 10 lai an chenho hnua test nawn lehnaa  a positive leh ta si hian sawi a hlawh hle.