Lirnghingin biak-in, hall leh in a tichhia
Nimin zing dar 4:10 khan Mizoramah lìr a nghîng a, Mizoram khawchhak lamah in tihchhiat nei nual mah se, mihring thi leh hliam an awm lo. June 21, Pathianni tlai dar 4 pelh hret khan magnitude 5.1-a náin lir a nghing bawk a, hei erawh hi chuan thil tihchhiat a neih hriat a ni lo.
National Centre for Seismology tarlan danin, nimin zinga lirnghing inṭanna (epicentre) hi Tuipuiràla Khawbung leh Samthang inkar vel, 23.22 (latitude) leh 93.24 (longitude) inkar a ni a, magnitude 5.5-a ná niin, lei chhungril km. 20 vela thûk aṭanga inṭan a ni. Zing dar 4:10-a a nghìn hnu darkar chanve velah na vak loin a nghîng leh bawk.
Nimin zinga lirnghîng vang hian Zokhawtharah chuan Presbyterian Kohhran biak-in ceiling a chim bakah, bang a chhe nual a; mimal in leh vantlang in chhia leh khì a awm nual bawk a ni.
Khuangleng khuaah community hall ceiling a chim a, Presbyterian Kohhran biak-in a khîk nual bakah, mimal in nasa vak loa chhia a awm nual. Khawbungah in bang khì a awm nual. Samthangah Presbyterian Kohhran biak-in bang a chhe nasa a, YMA Hall pawh a chhe nual niin YMA hruaitute'n Vanglaini an hrilh.
Sesih khuaah Presbyterian Kohhran biak-in ceiling a chhia (a tla) a, mimal in pakhat nasa vak loin a chhe tel. Vaphai-ah UPC biak-in a khi a, cement concrete (RCC) in awmte a khi deuh vek a, in chhunga bungrua tla chhia leh darthlalang keh eng emaw zat a awm. 'Ṭhasiama se no neihna' tlang pang hnuaia lung lian tak tak tlain Vaphai leh Chawngtui E inkar kawngpui a hnawh bawk.
Lirnghing chungchangah hian prime minister Narendra Modi chuan nimin zing lirnghing vanga chhiatnaah Mizoram puih a inhuam thu a tarlang nghal a; Twitter-ah 'Mizoram chief minister Pu Zoramthanga ka bia a, a theihna apiangah sorkar laipuiin puih a inhuam thu ka hrilh," a ti.
Union Home minister Amit Shah pawhin Twitter-ah, "Mizorama lirnghing chungchangah CM Pu Zoramthanga ka be tawh a, sorkar laipui aṭanga puihna awm thei apiangah Central chu pui turin a inhuam thu ka hrilh," a ti a; Mizorama lirnghing leh a nghawngte chu sorkar laipuiin a ngaihven thu leh mipui an him zel theih nan duhsakna an hlan thu a sawi.