Assembly golden jubilee lawm a ni ; Assembly Special Session buatsaih

Mizoram Legislative Assembly kum 50-na, golden jubilee pualin nimin khan Assembly Special Session neih a ni a, khuallian Governor Hari Babu Kambhampati-a'n jubilee thuchah a sawi.

Governor chuan, Mizoramin kawng hrang hrangin hmasawnna nei mah se, kawng ṭhenkhatah hma­sawnna ṭha zawk neih a ṭul thu a sawi a, "Power siam chhuah hi ka ngaih pawimawh hmasak a ni. Mizoram hian hydro electricity siam turin hmunhma a nei ṭha tih hrilh ka ni a, keini ang state lian lo, power hman ral pawh tlem tan chuan power-ah kan intodelh thei ngei ang," a ti.

Hriselna lamah pawh hmasawn a ṭula a hriat thu sawiin Larsap chuan, "Kan health infrastructure hi mipui tan tihhmasawn a ṭul. Tourism lamah pawh hma kan sawn thei a, hmalak meknate hi lawmawm ka ti," a ti a; Mizoramin tourism tihmasawn turin mipui hawihhâwmna leh English-a ṭawng thei an tamnate chu ṭangkai taka hman theih a nih thu a sawi.

Dr Hari Babu Kambhampati chuan, May 10, 1972 khan Mizoram union territory sorkara MLA 33 awmna Assembly session hmasa ber neih a nih thu sawiin, "Hemi ni aṭang hian Mizoram Legislative Assembly chuan hma lam pan zelin nasa takin hma a sawn a ni," a ti.

Governor chuan, kum 1987-a Mizoram state a nih aṭangin MLA 40 an awm tâk thu sawiin, "Mizoram Assembly chhunga ṭhutkhawm neih leh an rorelna kalpui dan a felfai ṭhin êm avangin state dangte mai ni loin, Parliament tan pawh entawn tlaka mawi a ni," a ti a; inthlanpui neih tawhte pawh a thianghlim a, sawisel kai a la awm loh thu a sawi.

Special Session hawngtu chief minister Zoramthanga, House leader chuan, India ram zalennain kum 75-na hmel a hmuh kuma Mizoram Legislative Assembly kum 50-na tlin an lawm thei chu lawmawm a tih thu sawiin, "State dangte Assembly aiin la naupang deuh mah se, House chhunga rorelna kalpui ṭhin danah na nâ nã chuan state upa zawkte entawn kan ni," a ti.

Chief Minister chuan, ram tin chu Pathianin malsawmna leh theihna a pek thu sawiin, "Chungte chu hmanrua atan hmang turin a ti a. Mizoram pawhin malsawmna ropui tak min pek hi thawn chhuak tur kan ni a, kan thawn chhuak mek a ni," a ti a; Pathianin Mizoram malsawmna a pekte chu thawn chhuah zel a nih tur thu a sawi.

Assembly speaker Lalrinliana Sailo chuan, Pathian vanga House-a ṭhu thei an nih thu sawiin, "Pathian mal­sawmna a ni a, thinlung takin Pathian hnenah lawmthu ka sawi," a ti.

Session-ah hian Assam Assembly speaker Biswajit Daimary pawhin sàwm a nih angin thu a sawi a; Lok Sabha speaker Om Birla erawh a hrisel­na dinhmun a ṭhat loh avangin a tel thei lo a, lawmpuina thuchah a thawn chu Lalrinliana Sailo-in a chhiar a ni.

Special Session-ah hian MNF Legislature Party aiawhin deputy chief minister Tawnluia, ZPM Legislature Party aiawhin Lalduhoma, Congress Legislature Party aiawhin Nihar Kanti Chakma leh BJP member Dr BD Chakma ten thu an sawi bawk.

Session zawhah Assembly Annexe building tuala golden jubilee puala lungphun siam chu Governor-in a hawng a, chawhnu lamah MLA ni mek leh ni tawhte'n jubilee dar an vua a ni.

MIZORAM LEGISLATIVE ASSEMBLY
1) Kum 1972-a union territory-a Mizoram hlàn kai a nih hnuah Assembly session hmasa ber May 10, 1972-ah neih a ni.
2) Mizoram UT a nih laiin MLA 33 an awm ṭhin a, an zinga 30 chu mipui thlan niin, a dang pathum chu chief minister-in a ruat (nominated seat) a ni.
3) State atana Mizoram puan a nih hnuah kum 1987 aṭangin MLA 40 an awm a, ruat seat a awm tawh lo.
4) Assembly session vawi 138 a awm tawh a, chu chuan ni 955 ṭhutkhawm a awh.
5) House-ah sorkar bill 488 pharh a ni tawh a, 477 chu pawm (pass) a ni.
6) House-ah report 500 chuang present a ni tawh.