Aizawl Bazarpui hun tiamah sa zo lo ; Sakna tur sum K-Deposit-ah dah a ni

ZPM MLA Lalchhuanthanga chuan, Aizawl New Market building pui ber chu sak zawh hun tiamah sak zawh a nih loh thu leh, sak ṭhatna tur sum chu K-Deposit-ah a awm vek thu a sawi.

Aizawl South-II bialtu MLA Lalchhuanthanga hian nimin khan press statement a tichhuak a; a sawi danin, Aizawl Bazarpui sak ṭhat hna hming chu Aizawl City Centre Annexe tih a ni a, October 4, 2018-ah khawih ṭan niin, kum thum (thla 36) chhunga sak zawh tura tih a ni.

Lalchhuanthanga chuan, Bazarpui sak ṭhatin chhungkaw 2,000 chuang eizawnna a tibuai tih sawiin, "Sak zawh hun tura tiam, kum thum leh a chanve a liam hnuah pawh sak zawh chu sawi loh, hna 35% chauh zawh a la ni hi Bazarpuia eizawngte ngaihthahna leh mipui zah lohna lian tak a ni," a ti.

Bazarpui sak ṭhat hna muan chhanah hripui mawhpuh lo tura MNF hruai sorkar chahin MLA chuan, "Hripui lên lai pawha airport cute sak hna Kamrul-a hnena cheng vaibelchhe tam tak man pe theitu sorkar hian mipui mamawh em em Aizawl Bazarpui sakna tur sum zawng zawng hi K Deposit-ah a dah thung a ni tih hi Zoram mipui hriatah ka puang duh a ni," a ti a; "Hei baka mipui harsatna ngaihthahna hi a awm thei tawh lo ang," tiin, Mizo mipui, Bazarpuia eizawngte aia mi pakhat, Kamrula duhsaktu sorkar Mizoramin a nei chu lungchhiatthlak a tih thu a sawi.

Aizawl South-II MLA chuan, ruahtui a tla ṭan tih sawiin, "Bazara eizawng tam tak chuan hulhliap mumal lo hnuaiah thli leh ruah doin ei an zawng mek. Heng mi harsa zawkte tawm hulna tur hi kan sorkar hian ngaihsak thuai rawh se," a ti a; Bazarpuia eizawngte'n a hma anga ei an zawn leh thuai theihna turin Aizawl City Centre Annexe sak hna chak taka kalpui turin MNF sorkar a phût.

RTI Act hmanga zawhna chhannaa a lan danin, Aizawl Bazarpui building pui ber sak hna thawktu chu Lushai Engineers an ni a, a sak nan Congress sorkar laia an policy pakhat, NEDP aṭangin cheng nuai 3,641.59 ruahman a ni.

A sakna sumah harsatna a awm leh awm loh zawhna chu, "Awm e. Sum hi a vaiin K. Deposit-ah dah a ni a, K. Deposit aṭanga lak chhuah mai hi sorkar sum harsat lai a nih avangin a harsa deuh a ni," tia chhàn a ni bawk.