Serchhipah gas home delivery hawng

MIZOFED leh Serchhip District Consumer Association chuan Serchhip P&E Vengah eirawngbawlna gas (LPG) home delivery an kalpui ṭan dawn a; home delivery kalpui tur chu nimin khan Serchhip P&E YMA Hall-ah Food, Civil Supplies & Consumer Affairs director Ramdinliani'n a hawng.

Hawnna inkhawm hi MIZOFED chairman K Rothangpuia'n a kaihruai a; FCSCA Director chuan, ram chhung khawpui dangah pipeline connection hmangin eirawngbawlna gas an lâk tawh thu sawiin, "Home delivery hawn a ni hi a lawmawm rualin, hmabak kan la ngahzia tilangtu a tling," a ti a, Covid-19 léng avanga thil hrang hranga home delivery kalpui a nih thu leh a ṭangkai thu a sawi.

Consumer-te ina gas pek man (delivery charge) atana bithliah Rs 70 chu a ngheh bur (fixed) loh thu sawiin Ramdinliani chuan, "A san theihna ber rate (maximum delivery rate) a ni. Company, distributor leh consumer-te an chhiat bik lohna tur atana duan a ni," a ti.

LPG home delivery hawnnaah hian Sechhip DCSO, Legal Metrology department, District Consumer Association, media, VC leh YMA aiawhte an tel a ni.