MLA ni mek leh MLA hluite an inkâwm

Mizoram Legislative Assembly kum 50 tlin lawmna kal zelah nimin chawhnu khan Assembly House Annexe conference hall-ah Legislators' Joint Meeting neih a ni a, MLA ni mekte leh MLA hluite an inkâwm khawm.

Inkawmhona hun hi Assembly speaker Lalrinliana Sailo-in a kaihruai a, chief minister Zoramthanga'n Assembly speaker hmasa ber Dr H Thansanga hnenah chawimawina thilpek a hlan. Deputy chief minister Tawnluia'n Assembly speaker hlui Dr Kenneth Chawngliana hnenah, deputy speaker Lalrinawma'n Assembly speaker lo ni tawh leh minister ni mek Lalchamliana hnenah leh, Parliamentary Affairs minister TJ Lalnuntluanga'n speaker hlui R Romawia hnenah chawimawina thilpek a hlan bawk.

Legislator hmasa ber zinga mi - C Chawngkunga, K Sangchum leh Sapliana Vandir-te hnenah pawh chawimawina hlan a ni a; Deputy Chief Minister-in Mizoram Legislative Assembly Golden Jubilee souvenir a tlangzarh bawk a ni.