ZPM VUC-in hruaitu leh MLA atan ruih theih thilin a tih­buai an duh lo

Zoram Peoples' Movement (ZPM) Val Upa Council (VUC) chuan, ZPM party-a nihna pawimawh chelhtute leh MLA candidate turte chu ruih theih thilin a tihbuai loh an ni tur a ni tih an puang.

April 28, 2022-a ZPM Val Upa Council ṭhukhawm chuan, "Kalphung thar champion-pui tum kan nih angin, hruaitute chu nungchangah duhtui a ṭul hlein kan hria a, chuvangin, party-a dinhmun pawimawh chelhtute leh MLA candidate turte chu ruih theih thilin a tihbuai loh an ni ngei tur a ni," tiin thutlukna (resolution) an siam a; an resolution chu May 9, 2022 (Thawhṭanni) khan ZPM VUC secretary Prof. Thang­chungnunga’n party chhung inkhawmah a puang.

ZPM VUC chuan, VUC resolu­tion chu tihhlawhtlin a nih theih nan ZPM president Lalliansawta hnenah ziakin an thlen a, a ṭul anga ngaihtuah turin an chah a ni.