MADC-ah BJP-in sorkarna siam an tum

Mara Autonomous District Council (MADC) inthlanpui zawh taka seat la tam ber BJP chuan anmahniin sorkar siam thei lo mah se, sorkar siam ngei an tum.

Vanglaini palai zawhna chhangin BJP, Mizoram Pradesh president Vanlalhmuaka chuan, dan angin sorkar siam an dil thei reng tih a sawi a, "Tun dinhmunah majority nei loh mah ila, sorkarna kan siam a nih pawhin, sorkar bûk a nih hunah kan chak ngei kan ring," a ti.

Vanlalhmuaka chuan, sorkarna siam an la dil dawn rih loh thu sawiin, "Tun dinhmunah inbiaknate a kal mek a, boruak kan la ngaichâng mek," a ti a; sorkar siam tura ngai zat MDC 13 an neih theih ngei a rin thu a sawi.

Tarlan tawh angin, MADC-ah hian seat/ bial 25 a awm a, BJP-in seat 12, MNF-in seat pakua leh Congress-in seat pali an la a; sorkar­na siam turin seat 13 lak a ngaih avangin party mala sorkar siam thei an awm rih lo a ni.