KHAWTHLIR

Thisen pe
State Referral Hospital/ Zoram Medical College-a nurse-te chuan nimin khan ZMC Blood Bank-ah thisen unit 17 an pe a, petute hmeichhia 11 leh mipa paruk an ni.

STA ṭhukhawm
State Transport Authority (STA) chu an chairman KT Beicho, Transport secretary hoin nimin khan STA conference hall-ah an ṭhukhawm. Aizawla line bus tlân dan, maxicab atan Maruti Suzuki Ertiga hman dilna, Mizoram Taxi Association aṭanga dilna, auto-rickshaw-a fare meter vuah, ICT department nen ṭang duna four wheeler leh two wheeler taxi atana fare software duan mek chungchangte leh ṭul dangte an sawiho a ni.

Zampui an lâwm
Mizo Convention, Zampui Tlang chuan thuchhuah siamin, Mizoram sorkarin Zampui tlang leh Aizawl inkarah MST bus a tlantir ta chu lawmawm an tih thu an tarlang a, "Pathian chungah leh Mizoram sorkar leh mipui chungah lawmthu kan sawi tak meuh a ni," an ti a, bus service hian state pahnihte inkarah inkungkaihna ṭha, thawhhona ṭha leh insumdawn tawnna ṭha a hrin zel tur thu an tarlang.

Hmanrua sem
Khawzawl bawrhsap CC Lalchhuangkima chuan nimin khan Tualte khuaa tomato chíngtu chhungkaw 230 hnenah tui lâkna tur pipe tlâwn 250 leh tuikhuah siamna tur silpauline 250 a sem. Hmanruate hi deputy chief minister Tawnluia, bialtu MLA fund aṭanga lei a ni.

Ambulance hlân
Lunglei bawrhsap Kulothungan A chuan nimin khan DC conference hall-ah Powergrid Corporation of India-in CSR kaltlanga ambulance an pek chu Lunglei chief medical officer Dr LC Liana hnenah a hlân. Ambulance hi Rs 6,70,740 man a ni a, tun hnaia Lunglei district-in CSR kaltlanga ambulance a dawn pathumna a ni.