Aizawlah chhiatna thlena Hmalak dan tur inzirtir

Aizawl District Disaster Management Authority (ADDMA) chairman Dr Lalhriatzuali Ralte chuan nimin khan Chanmari YMA Hall-ah Aizawl khawpuia Local Level Disaster Management Committee-te tan khuarel chhiatna a thlen palha chêt lâk dan tur inzirtirna a hawng.

Dr Lalhriatzuali Ralte chuan, khuarel chhiatna a thlen palha mawhphurtu hrang hrangte'n rang taka hma an lak dan tur ruahmanna, incident response system (IRS) chu Aizawl district tan din a ni tawh tih a sawi a, "Hripui a len hmain School Safety Programme kaltlangin Aizawla sikul 50-a zirtirtute zirtir bakah, awareness programme leh evacuation drill-te neih a ni," a ti.

Khuarel chhiatna a thlenin a tuartute hnenah ADDMA-in State Disaster Response Fund kaltlangin ṭanpuina awm ang angte an pek ṭhin thu sawiin Lalhriatzuali Ralte chuan, "Aizawl district-a Covid-19 vanga thi chhungte hnenah ex-gratia (ràlna) mi 349 hnenah pek a ni tawh a, fund dawn leh hunah tuna dilna dawn sa mi 27 hnenah pek leh a ni ang," a ti a; CSR aṭanga sum hmuh hmangin makeshift CCC sak zawh a nih tawh thu a sawi.

Nimina zirhona hi Aizawla zone I-VIII chhunga Local Disaster Management Committee member-te tana buatsaih a ni a, mithiamte'n thil pawimawhte an zirtir bakah, zawhna leh chhanna hun hman a ni. Vawiinah Aizawla zone IX-XIV huam chhunga mite tan buatsaih leh a ni ang.