Danglamna thlen turin ke kan pên - PC President

Peoples Conference party president Lalhmangaiha Sailo chuan, "Mizorama danglamna thlen turin ke kan rawn pên e," a ti a, hma lakpui atan ram siamṭhat duhtu zawng zawng a sáwm.

Lalhmangaiha Sailo hian nimina an party pisaah hruaitu ruat tharte a puang a, "Kan rama political party zawng zawngin ram siamṭhat an duh vek laiin, tun hnaia sorkar kan neihte'n ram mamawh aia anmahni duh zawng leh hamṭhatna tur an ngaih pawimawh zawk fo avangin mipui kan rûm a. Kan ram mamawh mila hma la a, Mizorama danglamna thlen turin ke kan rawn pên a ni tih hriaa min zawm zel turin ram siamṭhat duh zawng zawng ka sáwm a ni," a ti.

PC President chuan, ram tana inpumpek a ṭul thu sawiin, "Kan rama danglamna thlen a nih loh a, tuna kan kal dan hian kan kal zel chuan boralna kan pan dawn. Ram leh hnam ding chhuak kan nih ngei theih nana hma la turin kan inpeih tawh a, ke kan pên ṭan a ni," a ti bawk.